Sunday, 13 October 2019

TULISOMA NA KULELEWA 

KWA KUCHARAZWA 

BAKORA NA VIBOKO JUU!

Ndio Maana Vijana Sie Tuliozaliwa Miaka 1960 - 1980s Tuna Adabu na Heshima za Kutosha Kabisa.

Kipindi ambacho sie tunasoma kuchapwa ilikuwa kama sehemu ya mtaala wa elimu. Na kuchapwa mtoto haikuwa kesi, na ukijitia umbea kwenda kusema nyumbani, mzazi au mlezi wako naye atakurapua vizuri tu.

Hii ilileta heshima kwa vijana wengi, na ndio maana vijana wa rika lile ambalo limezaliwa Miaka 1960 - 1980s ambao ni watu wazima sasa, tuna adabu za kutosha, kiasi cha kuweza kuzigawa kwa wengine wenye kuzihitaji.

Nakumbuka vizuri sana, kama wewe ni mwanafunzi basi kwa sie tuliozaliwa mjini, siku uanza saa kumi na moja au kumi na mbili alfajiri.

Utaamka na kujiandaa, kisha utawahi namba shuleni, hapo ina maana umefika shuleni saa moja kamili asubuhi, ukiwa na ufagio wako wa chelewa, uliotengenezwa kutokana na makuti ya mnazi..

Baada ya rokoo, unatafuta kiamba chako cha bustani na kukimwagilia maji ya kutosha. Baada ya hapo kuna kufagia kiwanja chako kisha ndio kengere ya mstarini itapigwa na tunajiunga mstarini.

Wataitwa wale ambao wamechelewa rokoo au hawakuwahi namba saa moja na watachapwa mbele ya wanafuzi wote. Hapo inategemea zamu ya mwalimu ataamua ni bakora ngapi ngapi!

Kisha mkiwa mstarini inategemea na siku, mfano shule niliyosoma mimi, siku za usafi wa mwili na mavazi ni Jumatatu na Jumatano au Alhamisi kama nakumbuka vizuri.

Hapo sasa ni kukaguliwa usafi wa nguo za shule, mwalimu atapita uku brasi bandi ya shule ikipiga ule wimbo maarufu wa "Baba paka, alisemaa shimo lile ni la panya..."

Mtakaguliwa sare za shule, kama zmefuliwa na kutakata na kunyooshwa vizuri, nakumbuka tulikuwa tukizipendezesha sare zetu mashati meupe kwa kuziweka wanga, sare imenyooka na uku mgongoni , tumeweka miraba kama mitatu hivi kwa kupindisha shati mgongoni na uku kaputura za rangi ya zambarau zikiwa zimenyooka vizuri na soksi nyeupe.

Wadada nao sketi zao ndefu kupita magoti kidogo na soksi nyeupe ndefu karibia na magoti, na nywele zimesukwa, mtindo wa twende kwa bibi. Wanapendeza wasichana hawana hata wanja wala vipodozi wala nyele za mawigi au kusukwa rasta.

Kivumbi sasa ukutwe ujachana nywele unapitishwa mbele ya mstari, kwa wasichana ambao wana nywele ndefu mtindo ni mmoja tu, kusuka kwa mlazo (Twende kwa Bibi). Zikikutwa zimefumuka fumuka nao wanaletwa mbele na kuadhibiwa, yaani hapo ni mwendo wa bakora!

Kiufupi ukikutwa na kucha ndefu, bakora inakuhusu, ukikutwa na kucha chafu, ukiwa ujakoga, ujapiga mswaki mdomo unanuka, mwalimu kasugua shingo yako katoka na nongo, bakora zitakuhusu.

Baada ya ukaguzi ulioambatana na brasi bendi, hapo ndio kiranja wa zamu ataitwa mbele na mwendo wa gwaride mguu upande na wote tunaitikia, mojaaaaa!!!, Mguu sawaaa, Mojaaa! Nyumaaaz, geuka... !! Moja mbili tatu moja... Kisha mwendo wa mchaka mchaka, tunazunguka aidha kiwanja cha mpira cha hapo shuleni au mnazunguka shule raundi kadhaa, kisha ndio tunaelekea madarasani kwa mwendo wa haraka. 

Darasani nako kuna bakora zinakusubiri, kama ukufanya homu weki ya mwalimu, ni bakora, umefanya homu weki ya hesabu ukakosa, basi mwalimu wako wa hesabu alisha kutaadharisha, kosa moja bakora moja au hata tatu. Ukuudhuria kipindi chake jana yake, bakora! Umechelewa kuingia darasani, bakora...!

Na kabla ya hapo ukute kaingia siku hiyo kachangamka anaanza na mwendo wa tebo. Utasikia unaitwa jina, Sindika Mtakuja! utaitikia... Naam mwalimu, kisha linafuata swali, sita mara nane!  umebabaika au ukikosea utashtukia bakora ya mgongo kama si bakora ya kichwa!

Atachaguliwa mwngine, mwalimu ataita, Mwanshamba Sijali! Sita mara saba, utasikia sauti kali ya kike, ...Arobaini na mbili mwalimu.
Mwalimu atamsifia, Safi sana Mwashamba...!

Ataita jina lingine, Mary Mlekwa, bee! Mwalimu, nane mara tano, arobaini mwalimu....!

Sasa ole wako ukutwe na kikokotozi, wenye lugha yao wanaita kalikuleta au sijui umekutwa na zile saa za kasio zenye kikokotozi ndani yake, hapo ndipo utakapo ipata freshi kwa bakora utakazo charazwa. 

Mpaka kipindi cha hesabu kinaisha, unaweza jikuta una bakora za kutosha.... Bado walimu wa masomo mengine nao awajaingia na kuwacharaza kwa makosa mbali mbali.

Kelele za darasani zilisabisha kuchapwa darasa zima, labda monita wa darasa awe amepeleka majina ya waongeaji darani.

Ukiwa mbishi mbishi kwa kuwa tu ushaanza kubarehe na kujiona umekuwa, hapo utajikuta unapelekwa stafurum ya walimu. Uko ukiingia tu baada ya shikamoo walimu ni kupiga magoti. Na walimu wa makusudi watakuuliza kosa lako nini, utasema na utakuraaa (kwa rafidhi ya Kikurya) mboko za kutosha kwa kila mwalimu aliyeko stafu rumu.

Baada ya hapo utarudi zako darasani na kukuta mwalimu amesha maliza kuandika notsi ubaoni na kaacha homuweki. Hapo sasa ni juhudi zako mwenyewe kuwaomba wanafunzi wenzako ukopi maswali na kutafuta majibu kwa siku ya pili.

Kwa sie ambao tulipitia madrasa za kuhifadhisha Qur'an, tukiita chuoni, uko nako walimu ilikuwa mwendo ni ule ule, ujaifadhi, vizuri ni bakora! Umesoma vibaya Qur'an ni bakora! Sijui umesahau juzuu nyumbani, bakora! Umevaa kofia upande mwalimu ajapenda hapo bakora zitakuhusu.

Miaka hiyo mtoto au mtoto tineja, kuchapwa na walimu au mzazi nyumbani wala haikuwa jambo la kushangaza... Japokuwa tulikuwa na changamoto nyingi za kimaisha, lakini walimu tuliwaheshimu na ukikutana nae aidha asubuhi shuleni au wakati wa kuodoka tukiwabebea mifuko yao.

Ole wako sasa mwalimu anaingia shule au anaondoka na wewe ujamsaidia kubeba mfuko wake, utatia akili siku hiyo, haijalishi ni wa darasa lake au lah. Utaitwa na utachapwa mbele ya wanafunzi mstarini kwa ukosefu wa adabu, umemuona mwalimu kisha ukalala mbele...

Tulinunua kashata zao na bajia na hata kukopa na kulipa pesa siku ya pili yake, kwa wale wa vijijini, kwenda kumlimia mwalimu haikuwa jambo la ajabu na bado pia shamba la shule likiwasubiri.

Tulichapwa na tulinyooka kweli kweli, na wale ambao walishindikana kabisa, waliishia kufukuzwa shule na kiukweli hata maisha yao baada ya shule hayakuwa mazuri hata kidogo.

Shule haikuwa sehemu ya starehe na upuuzi upuuzi, maswala ya kuferi kwenye mitihani ya mwezi, ilikuwa jambo ambalo halivumiliki, na bakora utaziramba za kutosha.

Ndio maana sisi watoto wa enzi hizo, tuna adabu na heshma zetu, ukuti tukitukanana mitandaoni au kuitana majina ya kebehi, si mitaani wala mitandaoni.

Haya maswala ya haki sijui za binadamu, ushoga na usagani, halikuwepo kabisa, kwanza ilikuwa aibu kubwa sana. Leo hii, tumevamia mienendo ya kimagharibi, kiasi watoto waharibike, maana kuna rundo za wana harakati wa kila namna wa kuharibu watoto kwa kisingizo cha haki za watoto sijui binadamu.

Mie nasema hivi, kama shule imeweka sheria ya kutotumia vironga ronga, basi nasema hongera mkuuwa mkoa na hongera rais wa Jamuhuri ya Muungano wa Tanzania kwa kumuunga mkono mkuu wa mkoa. Na tutakuunga mkono na kupigia debe adhabu za kucharazwa bakora kwa wanafunzi na hata watu wazima ambao awana adabu, wafujaji na waarifu mbalimbali, wote hao bakoraaaa zinawahusu.

Nasema hivi, wachapweee tuuuu...


Thursday, 18 July 2019

Kuna faida nyingi na kubwa sana, inapatikana kwenye vifaa janja (smart) vilivyotiwa Akili Bandia (AI) na haswa vikitumika vizuri na walengwa. Lakini hapo hapo kama vikitumika vibaya kwa ukiukwaji mkubwa wa haki ya mmiliki wa vifaa hivyo basi kutakuwa hakuna tena faragha wala usiri (Privacy) kwa mtumiaji wa vifaa janja.

Yatakapo tokea haya yote basi ile nadharia ya NWO (New World Order), ndipo itakapofanyakazi kiuhakika zaidi.

Kwa sababu uduma za kijamii zitakapokuwa zinaendeshwa na AI Technologies na kufikia mpaka magari na majumba yetu kukawa na vifaa tunavyo vitegemea kila siku kama Runinga janja, Jokofu janja, majiko jamnja, vitanda janja na hata milango na mageti ya majumba yetu kupandikizwa akili bandia (Artificial Intelligence) na kuwa janja, kwa lugha ya walami wanita smart, basi hapo sasa ndipo tutakapo tawaliwa vizuri zaidi na hao wenye umiliki wa hivyo vifaa.

Hakuta kuwa na usiri wala faragha (privacy) kwenye majumba yetu na sehemu zote za mikusanyiko hata ile ya ndani ya kifamilia.

Kwa sababu, hivi vifaa ambavyo vipo sasa kama vile rununu au simujanja (smartphone) tayari tutake tusitake zinaangaliwa kwa saa ishirini na nne, hata ukizima data, lakini wakitaka kujuwa wapi ulipo wanajua, maana ile app ya ramani ya google au zile tomtom Rider kwenye vipando, vyote vimewekea kitu kinaitwa GPS (Global Positioning System) ambayo inatambua wapi ulipo na wapi umeingia, duka gani au nyumba gani upo kiuhakika zaidi kwa aslimia 95% kama si 100%

Hivi karibuni mitandaoni kulikuwa na mijadala kuhusiana na Runinga janja (Smart TV) kuwa kuna uwezekano wa mtu alie upande wa pili kuona upande wako kwa kutumia ile kamera iliyoko kwenye Runinga janja yako, kama vile wanavyoweza kuingilia mawasiliano ya Tarakilishi (kompyuta) au Kipakatalishi na kuweza kuona kile kilicho mbele ya kamera.

Basi vifaa vyenye akili bandia (AI) vitakapokuwa vimeenea kila sehemu, hapo ndipo binadamu atakapojikuta kuwa hana tena faragha, japokuwa kuna faida tele, kama vile nadharia ya kuweka Kipanzi (chip) kwenye miili ya watu kwa kisingizio cha kiusalama. 
Ni kweli kuna faida kubwa kuweka vibanzi kwenye miili kama zinavyo onyesha kwa wanyama kwa sababu chip zinapowekwa kwenye miili licha ya kujuwa mahala gani ulipo pia zina ambatana na taarifa zako zote binafsi zilizo muhimu, kama vile jina lako, umri wako, utaifa wako, magonjwa yanayo kusumbua, aina ya damu yako kama ni A, B, AB au O, vyote hivyo vinakuwepo.

Kwa maana hiyo basi, inakuwa ni rahisi kukuhudumia pale unapopata ajali au unaposumbuliwa ghafla na ugonjwa na hata kama umepotea ni rahisi kukutafuta na kujuwa wapi upo.

Na hata mpango wa kutembea na pasi za kusafiria unaweza kuondoka kwa kuwa watu watakuwa na vibanzi kwenye miili yao, kiasi wakipita forodhani uhamiaji mipakani ni rahisi kwa mashine zenye akili bandia kutambua kuwa wewe ni raia na huitaji VIZA na pia kama unatafutwa basi ni rahisi kutambulikana.

Vilevile uhakika wa kuwatafuta watu waliopotea unaweza kurahisishwa kwa sababu unaweza kumfatilia mtoto au mtu aliyepotea kiurahusu zaidi, kama vile unavyotafutwa simu iliyopotea kwa kutumia utaalam wa GPS.

Google tayari wana gari linalojiendesha lenyewe, na mtu haitaji kuwa na leseni tena, maana gari unaliambia tu au kuandika wapi likupeleke, mtaa gani au mahala gani na linakupeleka bila tatizo.

Kuna Majokofu janja, yenye kutambua umeweka nini kwenye jokofu na kukushauri vyakula gani ule na vyakula vipi uviepuke.

Runinga janja, uliyokuwa nayo, inatambua vipindi gani unapendelea, kiasi ya kukutafutia vipindi vinavyo fanana na vile unavyo vipenda.

Milango ya majumba yanayofunguliwa aidha kwa sauti au kwa kuona sura yako tu, leo hii kuna viatu ambavyo vina weza kunakiri kasi ya mwendo wako, umbali uliotembea, hatua ulizotembea na kujirekebisha kulingana na umbo la mguu wako.

Na taarifa zote kutumwa kwenye Rununu yako au kwenye Tarakilishi au Kipakatalishi chako na kupendekeza namna ya utembeaji wako kulingana na migandamizo ya miguu yako.

Wanadamu tunapojivunia maendeleo ya vifaa tunavyo vitumia kila siku, vilevile tutambue kuwa hata wadukuzi (Hackers) nao hawapo nyuma kimaendeleo, kama wanavyoweza kudukua Rununu na Tarakilishi au Kipakatalishi, basi hata hivyo vifaa janja vingine pia vina uwezekano mkubwa wa kudukuliwa.

Magari yanaweza kuzimwa na kuwashwa na mtu aliyeko mbali zaidi ya kilomita 20,000, nyumba yako yenye milango janja inaweza kufunguliwa na kufungwa na mtu aliyeko nchi nyingine kabisa, kama vile haitoshi kukuona na kunakili (Record) kila unacho kifanya pia anaweza kuzima viyoyozi na vifaa vya joto kwa muda anaotaka mdukuwaji.

Gari lako janja, linaweza kibiwa bila ya mtu kuliendesha, likaendeshwa kwa kutumia Kitenzambali (Remote) na ukaamka asubuhi usilikute.

Ndipo hapo serikali itapoweza kuwafuatilia kila mtu aidha kwa uzuri au kwa ubaya, japokuwa kuna wana harakati ambao wanayapinga haya yote kwa kusema kuwa yanakiuka haki za binadamu, lakini watawala wanayataka yaje hata leo kwa sababu yatawarahisishia kutawala raiya na mali zao.

Haya yote yapo na yashafanyiwa majaribio na kuonyesha mafanikio makubwa kimatumizi, kinachofanyika hivi sasa ni kuyaleta kidogo kidogo kwa raia, nasi bila ya utambuzi tunayapokea na kuyatumia bila ya kujua nyuma ya pazia kuna zimwi gani linalosubiri kutupanda kichwani.

Kuna siku mwanangu mdogo aliwahi kuona Runinga zile zenye kichogo na kuniuliza ni kitu gani, siku moja nilimuonyesha simu zile za kuzungusha, akaniuliza sasa hii ukitaka kuzogoa (Chating) unatumaje meseji, hayo yote hivi sasa ni historia.

Basi na tujiandae kukabiliana na hayo yote, maana leo hii hakuna ambae aliweza kujuwa picha za kutumia filamu za negativu hazitakuwepo tena na kuzitupa kwenye kabati la sahau. 

Monday, 22 April 2019

JUMUIYA YA NATION OF ISLAM (NOI)

- Wallace Fard Muhammad,
- Elijah Muhammad,
- Warith Deen Mohammed
- Malcolm X
- Louis Farrakhan

Wengi wetu wamewahi kuona na kusikiliza Miadhara/Mahubiri ya Louis Farrakhan (Louis Eugene Walcott), kiongozi wa sasa wa Nation of Islam, dhehebu jipya linalijinasibisha na Uislamu nchini Marekani ya Kaskazini (USA).


Tunapo taka kumzungumzia Farrakhan, hatuwezi kuweka kando itikadi yake inayotokana na mafundisho yao yanayo shabihiana na Uqadiyyan.

Farrakhan kabla ya kujiunga na harakati za NOI, alikuwa ni mwanamuziki wa mtindi wa calypso Muimbaji na mpiga fidla (violin), na alitambulishwa NOI na rafiki yake na mwanamuziki mwenzake Rodney Smith, kwenye mkutano mkubwa wa mwaka uliojulikana kama Siku ya Waokozi (Saviours' Day).

Mkutano ambao ulikuwa unahutubiwa na Elijah Muhammad, alierithi uongozi kutoka kwa Wallace Fard Muhammad ambae ndio mwanzilishi wa NOI.


Na mwaka 1955, alikubaliwa kujiunga na NOI baada ya maombi yake kukubaliwa rasmi na Elijah Muhammad, na kupokea jina la X uku akisubiria jina jina, kutoka kwa kiongozi wa NOI (Wote wanaojiunga na NOI, upewa ubini wa X wakati wakisubiria majina mapya),  kwa hiyo akawa anaitwa Louis X, kabla ya kupewa jina Farrakhan, na baada ya hapo akatambuliwa rasmi kwa jina la Louis Farrakhan akiwa chini ya mafunzo kutoka kwa Malcolm X.

ELIJAH MUHAMMAD

Elijah Muhammad (Elijah Robert Poole) alizaliwa October 7, 1897 na kufariki tarehe 25 February, 1975.

Kulingana na maelezo yake mwenyewe, Elijah Muhammad, alifundishwa na Fard (mwanzilishi wa NOI) na mafunzo yake yalikua kila siku kwa miezi tisa mfurulizo, kisha mara kwa mara kwa muda wa miaka miwili.

Mnamo Mei 1933, muda mfupi baada ya kuhitimu na kusilimu na kupewa jina la Elijah Muhammad, Wallace D. Fard alipotea bila kuwajulisha wafuasi wake au kumtaja mrithi wake na hajaonekana mpaka leo.

Ndipo hapo Elijah, alipokamata uongozi, baada ya kuwashinda wapinzani wake kadhaa, Elijah Muhammad alisema kuwa Fard amemchagua kuwa mrithi wake na kumfundisha "mchana na usiku" kwa miaka mitatu. Alisema kuwa Fard alikuwa Mungu katika mwili (God incarnate), na kwamba Fard amemfunulia yeye peke yake na ndio Mtume wake.

Elijah Muhammad alianzisha gazeti, (The Final Call to Islam) Mwito wa Mwisho wa Uislamu, awali aklifundisha kuwa Fard ni nabii na baadaye akafundisha kuwa Fard ni Mwenyezi Mungu katika umbo la kibinadamu. (https://www.noi.org/noi-history/)


Elijah aliweza kupata wafuasi wengi kutokana na wengi wao walikuwa ni hoe hae kiuchumi, na NOI iliweza kuwasaidia kuwapatia kazi, kuwasomesha na kuwapa nyumba za kuishi.

Katika miaka ya 1970, NOI lilikuwa inamiliki Bekari za mikate, saluni za kunyolea, Migahawa, maduka ya vyakula, Maeneo ya kufulia nguo, Madanguro na klabu za usiku (night-clubs), mitambo ya uchapishaji, maduka ya rejareja, majengo mengi na mali zisizo hamishika, Mashamba Kadhaa makubwa, uko Michigan, Alabama, na Georgia.

Mpaka kufikia Mwaka wa 1972 NOI walikuwa na hisa kubwa kwenye mabenki ya Guaranty na Trust Co. NOI walikuwa wakimiliki shule kadhaa katika miji 47 nchini Marekani. Mwaka wa 1972, Muhammad aliwaambia wafuasi kwamba NOI lilikuwa na pesa zipatazo dola milioni 75.

UONGOZI MPYA

Alipofariki Elijah Muhammad mtoto wa Elijah Muhammad, Warith Deen Mohammed akachaguliwa kuwa kiongozi wa NOI. Na baade kubadilisha jina la harakati zao na kuita Jumuiya ya Kiislamu ya Ulimwengu wa Magharibi (World Community of Islam in the West). na baadae ikaitwa kwa jina la Jumuiya ya Waislamu wa Marekani (American Society of Muslims).


Warith Deen Mohammed alikuwa hakubaliani na mafundisho ya mwanzilishi wa NOI yaliokuwa yakifundisha kuwa Wallace D. Fard ni Mwenyezi Mungu katika Umbo la Kibinadamu na ndio Mahd na Masihi alie ahidiwa.

Na akaruhusu hata Wamarekani wenye asili ya Kizungu, kujiunga na harakati zao (Kabla ya hapo walikuwa hawaruhusiwi wazungu kujiunga nao, walikuwa wakiamini kuwa Wazungu wote ni Mashetani). Na alifanikiwa kuwavutia wanachama wasiopungua 2,000,000 (Milioni mbili wa NOI) kujiunga nae.

Farrakhan nae hakubaki nyuma, alijiunga na kumfuata kiongozi na Imam wao Warith Al-Deen Mohammed, wakifuata madhdhebu ya Sunni akiwa chini yake kwa miaka 3 1/2 kutoka mwaka 1975-1978. Imamu Muhammad akampa jina jipya la Abdul-Haleem.

KUASI KWA LOUS FARRAKHAN 

Lakini Mwaka wa 1978, Imam Farrakhan alijiondoa kutoka kwenye harakati za Warith Al-Deen Mohammed. Katika mahojiano ya mwaka 1990 na gazeti la Emerge, Farrakhan alisema kuwa alikuwa amekata tamaa na kuvunjika moyo baada ya kutambua kwamba imani iliyokuwa inafundishwa na Warith Al-Deen ilikuwa ya uwongo. Na akahamua kujiondoa kwenye harakati hizo na kuhuisha harakati zile zile zilizo hasisiwa na mwanzilishi wao Wallace Fard Muhammad.

Na Mwaka wa 1978, Farrakhan na akiambatana na idadi ndogo ya wafuasi waliamua kujenga upya Nation of Islam (NOI) kama lilivyokuwa awali na kuhuwisha ile misingi iliyoanzishwa na Wallace Fard Muhammad, na Eliya Muhammad. Hii ilifanyika bila ya kusemwa waziwazi.

Na baadhi ya itikadi yao ndio ile ya kuhitakidi kwamba Wallace Fard Muhammad ni Mungu katika Mwili na Elijah Muhammad ni Mtume wake.

Kama nilivyoeleza hapo juu kuwa wao wanahitakidi kuwa Elijah Muhammad kuwa ni Mjumbe (Messenger) wa MwenyeziMungu, na uhitumia Ayah hii kutoka kwenye Qur'an:

Na kila umma una Mtume. Alipo wajia Mtume wao walihukumiwa baina yao kwa uadilifu, wala hawakudhulumiwa.
Quran 10:47

Vilevile wanahitakidi kuwa mwanzilishi wa kundi lao Master W. Fard Muhammad, ndio huyo Masihi aliyehaidiwa wa Wayahudi na ndio huyo huyo Mahdi wa Waislamu na Ndio Mungu mwenyewe katika mwili.

Kubwa lingine kwenye vitabu vyao wanasema kuwa MwenyeziMungu alikuja duniani kwa umbo la kibinadamu na kwa jina la Fard Muhammad na kumchagua Elijah Muhammad  kuwa ni mtume au mjumbe wa MwenyeziMungu.

Ndio ukaona wakina Muhammad Ali na hata Malcolm X (Al-Hajj Malik Al-Shabazz) na wengine wakajitambua na kutambua kuwa hili ni kundi potovu wakajitoa.

Kwenye baadhi ya mafunzo yao wanasema kuwa:
- Watu weusi ndio hasa watu Halisi na wa Asili.
- Watu weupe (white people) ni Mashetani (devil).
- Watu weusi ni bora zaidi (superior) ya weupe.

Mtu mweusi nchini Amerika ya Kaskazini (USA) sio Negro, bali wao wanatoka kabila la Shabazz kabila lilipotea zamani, na waliibwa na wafanyabiashara kutoka Mji wao Mtakatifu wa Makka miaka 379 iliyopita.

Mtume (Fard) alikuja Marekani ili kuwaokoa ndugu zake waliopotea kwa muda mrefu, ambao Wazungu wamewapotozea lugha yao ya Kiarabu, utaifa wao na dini yao.
...Wanapaswa kujifunza kwamba wao ni watu wa asili, wa kwanza kabisa wa mataifa ya dunia. Wazungu yaani watu weupe wamepoteza rangi yao ya asili. Kwa hali hiyo basi Watu wa asili wanapaswa kurejesha dini yao, ambayo ni Uislamu, lugha yao, ambayo ni Kiarabu, na utamaduni wao, ambao ni elimu ya Anga (Elimu ya Faraki – astronomy) elimu ya juu ya hisabati, hasa mahesabu. Wanapaswa kuishi kulingana na sharia ya Mwenyezi Mungu, wakiepuka nyama zote zenye sumu kama vile, nyama ya Nguruwe, Bata, Bata bukini, jamii ya ndezi na samaki aina ya Kambare. Wanapaswa kuacha kabisa matumizi ya stimulants (Vihamshi), hasa pombe. Wanapaswa kujitakasa wenyewe - miili yao na nyumba zao. Na kwa njia hii watakua wakimtii Mwenyezi Mungu, nae atawarejesha tena kwenye Paradiso ambayo waliibwa uko kwenye mji wao wa asili- Mji Mtakatifu wa Makka.

Je Mafundisho ya huyu mtu yanafaa kusambazwa, maana itikadi yake haina tofauti na Maqadiyyan, hata huyu ana amini kuwa kuna mitume zaidi ya Mtume Muhammad (saw), je yafaa kujifunza kutoka kwao?

Wednesday, 20 March 2019

Ule Uhasama Kati ya CCM na CUF, Usije Ukawa wa Vyama Vitatu, CCM, ACT na CUF

Kabla ya Mapinduzi ya Zanzibar, historia inaonyesha kwamba, uko Zanzibar kulikuwa na mizozano mikubwa ya kisiasa baina ya vyama vikubwa vya kisiasa, yaani ASP na ZNP (Hizbu).  Mizozano hii ilijiri kati ya miaka 1955 mpaka1964, ilipoamuliwa kuwa na chama kimoja tu cha siasa uwamuzi ambao ulizima migawanyiko ya kisiasa ndani ya visiwa vya Zanzibar baada ya mapinduzi.

Makovu yale yaliotokana na chuki kati ya Wazanzibar wenyewe si kwamba yalikuwa yamepona kabisa, lahasha, ndani ya makovu yale kulikuwa na vidonda vibichi, vilivyokuwa vikifukuta kama shaba iliyoyayushwa.

Mfumo wa vyama vingi uliporuhusiwa tena na 1995 uchaguzi ulipo fanyika na CCM kuchukua ushindi, makovu yale ambayo yalizaniwa kuwa yamepona kabisa, yalitumbuka upya na kuwa vidonda vipya, uhasama mkubwa ukarejea upya kiasi cha kusababisha chuki kubwa baina ya ndugu wa familia moja kutoshirikiana katika shughuli za kijamii, kama harusi na misiba na mambo mengine kadhaa.

Hali ilikuwa mbaya zaidi kisiwani Pemba, maana walibaguana katika misiba, sherehe, vyombo vya usafiri na biashara, jambo ambalo lilidhorotesha maendeleo visiwani humo.

Matukio ya watu kuvamiwa na kupigwa, wananchi kususa kununua bidhaa za wafuasi wa chama kimoja, mabasi kukosa abiria au abiria kushushwa kwa sababu ya tofauti za kiitikadi, kususia kushiriki katika maziko na harusi yalitawala kwenye kisiwa hicho ambacho ni moja ya visiwa vikubwa viwili vinavyounda Zanzibar.

Mpaka kufikia mwezi Julai 31 ya mwaka 2010, baada ya kura ya maoni ya kuunda Serikali ya umoja wa kitaifa, uhasama na chuki baina ya wapenzi wa CUF na CCM, ukawekwa kando.

Hizi zilikuwa ni juhudi za viongozi wawili, aliekuwa rais wa Zanzibar Amani Karume na katibu mkuu wa CUF, Seif Sharif Hamadi walipohamua kuwa sasa inatosha na kwa kupitia vyama vyao (CCM na CUF) waamua kuwe na Maridhiano na Serikali ya umoja wa kitaifa ikaundwa.

Tukashuhudia utulivu, amani na upendo vikirejea tena miongoni mwa Wazanzibar wenyewe na maisha yakawa yenye utulivu, japokuwa si wote walilifurahia hili, maana kulikuwa na matukio ya hapa na pale kuonyesha kuwa si shwari kama inavyo onekana.

Nakumbuka vurugu kubwa zilizotokea mwezi May mwaka 2012, pale Jumuiya ya Uamsho ilipohusika na kuwachochea vijana kukusanyika na kufanya uharibifu ikiwemo kuchoma moto gari, kupanga mawe barabarani na kufanya hujuma mbali mbali kinyume cha sheria.

Chanzo cha vurugu zile zilitokana na wanaharakati hao kufanya maandamano makubwa ya kushtukiza ambayo yalizistua mamlaka za usalama visiwani humo, lakini baada ya kutawanyika jioni yake baadhi ya viongozi wa maandamano hayo walitiwa mbaroni.

Hayo twaweza sema yalishapita, maana kuna msemo mmoja wa Kiswahili unasema hivi; "Yaliopita si ndwele, tugange yajayo".

Wasiwasi wangu ni huu mgawanyiko uliotokea hivi karibumi, kwa baadhi ya viongozi na wanachama wa CUF, walipoamua kujiunga kwenye chama cha ACT, baada ya upande unao ongozwa na Pro. Lipumba kushinda kesi iliyokuwa inawakabila baina ya wanao unga mkono upande wa Seif Sharifu na upande wa Pro. Lipumba.

Nachelea ule uadui uliokuwa baina ya CUF na CCM, ukawa baina ya ACT, CUF na CCM kwa mbali, binafsi naamini kwa dhati kabisa kuwa lolote litakaloamuliwa na viongozi hawa wa CUF na ACT wanachama watalifuata.

Tunarajia, ule uhasama uliokuwepo baina ya wanachama wa CUF na CCM kiasi cha kutoshirikiana katika shughuli za kijamii, usihamie kwa wanachama wa CUF na ACT na wala usibakie CCM, vyama vya kisiasa hisiwe sababu ya kuharibu udugu, urafiki na ujamaa baina ya wanachama wa pande zote.

Tusisikie tena wanachama wa chama kimoja aidha ACT, CUF au CCM, wanashushwa kwenye daladala au kutouziwa bidhaa ya aina yoyote wanapokwenda markiti au dukani.

Tusisikie tena mashamba kuvamiwa na mazao kuharibiwa kwa sababu za itikadi za kisisas au kufukuzwa kwenye nyumba au kuchomeana nyumba kwa kuwa tu, fulani ni CCM/CUF/ACT.

Tusisikie tena, habari za kupopolewa kwa mawe kwa viongozi wa kisiasa kama ilivyowahi kutokea walipo popolewa mawe Maalim Seif Hamad na Dk  Mohamed Shein. Nakumbuka misafara yote miwili ilishambuliwa jioni ambapo baadhi ya wafuasi wa vyama hivyo walijeruhiwa na kukimbizwa hospitalini kwa matibabu.

Naandika haya kwa sababu, kugawanyika kwao kisiasa kunawafanya Wazanzibari wasiweze kukubaliana kuhusu masuala nyeti yanayohusu mustakbali wao na wa vizazi vyao vijavyo...

Thursday, 14 March 2019


Uchunguzi wa BBC Umebaini Matumizi ya Ugoro Ukeni

Baadhi ya wanawake kutoka mkoa wa Tabora nchini Tanzania wamekiri kuweka tumbaku katika sehemu zao za siri ili kupunguza hamu ya kufanya mapenzi (Jimai), huo ni uchunguzi uliofanywa na shirika la utangazaji la BBC.

Tabia hii ya wanawake kuweka Ugoro kwenye sehemu zao za siri umekuwa ni maarufu sana haswa kwa wanawake ambao hawaja olewa, wajane na wale walio olewa ila wanaishi mbali na waume zao.

Madaktari wameonya kwamba tabia hii ya wanawake kuweka ugoro sehemu za siri si salama kiafya na kuna uwezekano mkubwa wa kupata saratani ya kizazi na matatizo mengine ya kiafya (Hakuna utafiti rasmi kuthibitisha).

Wanawake wengi huko Tabora, ambao ni wajane, na wale ambao hawapo kwenye mahusiano au waume zao wapo mbali nao, wanatumia njia hii ili kupunguza hamu ya kufanya mapenzi.

Zaituni Shaban (mjane), anasema tangia mumewe kufariki, hajawahi kujisikia haja ya kupata mume mwingine.
"Naweka tu ugoro kwenye sehemu zangu za siri mara mbili kwa wiki. Hivi sasa, sina mpenzi wa kijinsia, na sijawahi kujisikia haja ya kuwa na mume, tangia kifo cha mume wangu miaka michache iliyopita," anasema Bi Shaban.
Mwanamke mwingine, Asha (sio jina lake halisi), anasema ameigeukia tumbaku "...na imeua kabisa hamu yangu ya jimai kwa sababu tangu nilipotelekezwa nikiwa mjamzito, sitaki kusikia chochote kutoka kwa wanaume na haswa swala la ngono".

"Ugoro unanitoshereza kabisa. Ninapotumia hamu yangu yote ya ngono hufa" alisema Asha.

Wanawake wengi wanasema mara nyingi wanachukua majani ya tumbaku ghafi, uyasaga na kuchanganya na mafuta ya Vaseline au Petroleum jelly na Magadi soda (au Majivu) ili kufanya mchanganyiko ywenye ufanisi.

Wanawake wengi walizungumza na BBC, walisema kwamba sehemu zao za siri uwasha kwa muda baada ya kutumia mchanganyiko huo.
"Mara nyingi mimi huweka tumbaku katika sehemu zangu za siri mara mbili kwa wiki. Inakaa huko kwa dakika chache kabla ya kuiondoa kwa kuosha. Baada ya hapo, huwa nasikia muwasho kwa muda na baada ya hapo hisia za kufanya mapenzi uniondoka. Hakuna madhara yoyote yatokanayo na mchanganyiko huu ninaoujua mimi..."anasema Zaituni Shaban.
Wanawake hao kwa ujumla wanasema kwamba tumbaku uwarizisha kwenye hisia za kufanya mapenzi.

Wanaume katika Kijiji cha Ugala huko Tabora walipo hojiwa walisema hawajui kwamba wanawake katika mkoa huo wanatumia tumbaku katika sehemu zao za siri.

"Nimesikia sana huu uvumi kuhusu hii tabia ya wanawake kutumia tumbaku, lakini nilipowauliza, mara nyingi wananiambia: Hiyo ni siri yetu," alisema Mzee Usantu, mwenyeji wa Kijiji cha Ugala.

Madaktari wanawaonya wanawake dhidi ya kutumia tumbaku katika sehemu zao za siri kwa sababu inaweza kusababisha kansa ya mlango wa uzazi.
"Hakuna utafiti thabiti uliofanywa ili kujua haswa madhara ya tumbaku katika sehemu za siri za mwanamke. Hata hivyo, wengi wa wagonjwa wetu wa saratani ya kizazi wanatoka mkoani Tabora, na tukiwauliza wengi wao wanakubali kuwa wamekua wakitumia tumbaku kuweka sehemu zao siri, japo mara moja katika maisha yao," anasema daktari mmoja ambaye alizungumza na BBC.
Source:
Pulselive

Friday, 1 March 2019

Relationship Sexuality Education; RSE

 • Tunapaswa Kuruhusu Watoto katika Matamasha ya (Ngono) Wakaa Uchi?
 • Je Elimu ya Ngono Kufundishwa Mashuleni kuanzia Shule za Msingi darasa la Pili.

Nilikuwa nimekaa naangalia vipindi kwenye Luninga, taarifa za habari na mambo kadhaa yanayojiri ulimwenguni. Moja ya kipindi kilichovuta usikivu wangu, kilikuwa kinahusu mjadala wa wapendao kukaa uchi, wanao jihita Naturist, yaani wanaoitakidi kuwa binadamu asili yake ni kukaa uchi ni hiwe haki ya kila mtu, wakiwemo wanafamilia pamoja na watoto wanaopendelea kwenda uchi na hiwe haki kisheria kuwashirikisha watoto...

Mjadala huu, umenikumbusha ule mjadala wa mashoga, na kampeni zao za kutaka kila mtu aunge mkono harakati za kishoga za liwati na usagaji na hata ndoa za jinsia moja.

Kiasi sasa ndoa za jinsia moja zimehalalishwa kwenye baaadhi ya nchi za Ulaya, ikiwemo nchi za Ubelgiji (Belgium), Denmark, Ufini (Finland), Ufaransa (France), Uingereza, Ireland na nchi zingine za Amerika na Kiafrika pia ikiongozwa na nchi ya Afrika Kusini.

Awa awa karne chache tu nyuma, babu zao (Walami) walitawanyika duniani na haswa nchi za Kiafrika na kukuta baadhi ya watu (si wote) wakitembea uku wamevaa upatu tu, kusitiri viungo binafsi, wakawaona kuwa si wastaarabu na washezi. Wakawapa nguo na kuwashinikizia kuamini imani mpya.

Waafrika kama ilivyo asili yetu ni uungwana na kuwapenda wageni wakakubali baadhi ya ustaarabu wa hao Walami, baadhi wakaamini...

Leo hii, ustaarabu ule, umebakia kwa Waafrika na Ushenzi ule ule wa mababu wa Kilami, umekuja na umerejea kwa kasi sana kwenye hizi nchi za Kilami, kiasi ya kwamba, mwanamke akijistiri anaonekana yupo kinyume na ustaarabu wa dunia na ukiwa uungi mkono harakati za mashoga na wasagaji, basi waonekana wewe si mstaarabu tena mbaguzi, na unaweza hata kupata misukosuko na hata kutengwa na taasisi za Kiserikali na hata binafsi.

Kama haitoshi, hivi sasa kwenye hizi nchi zikiongozwa na Uingereza na Marekani, wamekuja na mtaala mpya wa Kielimu, kwamba watoto kuanzia shule za Msingi na sekondari ni lazima wafundishwe elimu ya Mahusiano na Elimu ya Jinsia - Ngono (Relationships and Sexuality Education ). Na ni somo la lazima, si hiyari.

Watoto watafundishwa mengi, yakiwemo kukubali uwepo wa familia tofauti tofauti kwa maana ya familia iliyo ya jinsia mbili (Mke na Mume) na ile inayojengwa na jinsia moja aidha mume/mume au mke/mke na mengine mengi kuhusiana na mahusiano ya Kingono.

Wengi wanaweza kusema, hayo ni ya uko Ughaibuni, lakini wasisahau kwamba, dunia hii ndogo, michanganyiko ya mila na tamaduni mbalimbali ndizo zinazojenga jamii na ni moja kati ya Utandawazi (globalization).

Haya yanayofanyika sasa kwenye hizi nchi za Kimagharibi, hayaishii kwenye hizo nchi tu, tumeshuhudia matishio kadhaa ya kiuchumi kwa nchi ambazo hazitoi haki za usawa kwa mashoga na wasagaji.

Kama nchi hairuhusu Ushoga basi ina hatari ya kuwekewa vikwanzo na nchi zinazo endeshwa na mashoga na kwa wale wazamiji wanataka kuishi hizi nchi, kiasi wamepata kisingizio, wanachofanya ni kusema tu kuwa wao ni mashoga na wamekimbia manyanyaso kwenye nchi zao, basi haraka sana wanakumbatiwa na kukubaliwa kupewa hifadhi.

Na sasa hivi kwenye hizi nchi zetu zinazoitwa dunia ya tatu, kampeni ndogo ndogo za chini chini zimeanza kuchipua, lengo ni kutaka kuionyesha jamii kuwa elimu ya ngono inapaswa kufundishwa kuanzia madarasa ya chini kabisa ya shule za msingi aidha kuanzia darasa la pili au la tatu kama si chekechekea.

Tutasikia visa vingi kutoka kwa mawakala wa ngono na mashoga, tutasimuliwa simulizi za kutunga na hata zile zenye ukweli nusu ili kuhalalisha elimu ya ngono ianze kufundishwa kuanzia aidha chekechea au shule za msingi kuanzia darasa la kwanza au la pili.

Tusipo kuwa makini, basi tutaingizwa kwenye ulimwengu wa manyani wa kutembelea utupu, tukibaki kuchekena kicheko cha (Ashamkumu si Matusi) "Nyani haoni Kundule.

Je tutawalinda vipi Watoto zetu, maana sasa ni Hamkani si Shwari tena

Sema: Mola Mlezi wangu ameharimisha mambo machafu ya dhaahiri na ya siri, na dhambi, na uasi bila ya haki...
Q 7:33

Sunday, 16 December 2018

KATIKA HILI NAMUUNGA MKONO RAIS MAGUFULI

Wengi wetu/baadhi yetu tutakuwa aidha tumesoma au kusikia tu kuwa Bunge la Umoja wa Ulaya (European Union) limepitisha maazimio kadhaa dhidi ya serikali ya Tanzania.

Maazimio hayo yana masharti mengi magumu, yakiwemo haki za ushoga (Hapa wengi wanashindwa kuelewa, unaposikia haki za mashoga hapo wana manisha si kutambuliwa uwepo wao tu, lah hasha bali kuwapatia uhuru wa kujitangaza, kuhamasisha wengine kujitokeza adharani na kujianika wazi na hata haki za kindoa za kuoana (Gay pride). 

Maazimio mengine ni kutetereka kwa haki za binadamu na kuminywa kwa demokrasia...

Binafsi namuunga mkono rais wa Jamuhuri ya Muungano ya Tanzania, Dk. John Pombe Magufuli na kuyapinga maazimio hayo ambayo kwa uwazi kabisa yameletwa kutokana na misimamo ya Rais ya kulinda rasilimali za Tanzania.

Kizaa zaa cha chuki na nia ya kulipiziwa kisasi kilianzia pale alipotoa amri ya kuzuiya mchanga wa dhahabu (makinikia) na kudhibiti Tanzanite. Vibaraka wachache walijitokeza na kuwaunga mkono wakoloni mambo leo, lakini kwa msimamo thabiti wa Rais wa nchi akisaidia na baraza lake la Mawaziri, walisimama kidete na kukataa waziwazi kuburuzwa na kuuza utu wetu kwa mabepari ambao kila kukicha wanatafuta mbinu mpya za kutubana ili wajichotee maliasili za Tanzania kwa ulahisi, uku wakitutaka kwa nguvu kuachana na mila na desturi zetu.

Tanzania ni nchi huru, yenye mamlaka kamili ya kujiamulia mambo yake yenyewe kama zilivyo huru nchi za ulaya na kujiamulia mambo yao wenyewe. Ustarabu wa ulaya si lazima uwe wa Afrika hususani Tanzania...

Mtuache tupumue

#RaisWanguNchiYangu
#NamuungaMkonoMagufuli
#RaisWanguMagufuli

RAMADHAN KARIM

Read

Subscribe to RSS Feed Follow me on Twitter!