Monday, 22 April 2019

JUMUIYA YA NATION OF ISLAM (NOI)

- Wallace Fard Muhammad,
- Elijah Muhammad,
- Warith Deen Mohammed
- Malcolm X
- Louis Farrakhan

Wengi wetu wamewahi kuona na kusikiliza Miadhara/Mahubiri ya Louis Farrakhan (Louis Eugene Walcott), kiongozi wa sasa wa Nation of Islam, dhehebu jipya linalijinasibisha na Uislamu nchini Marekani ya Kaskazini (USA).


Tunapo taka kumzungumzia Farrakhan, hatuwezi kuweka kando itikadi yake inayotokana na mafundisho yao yanayo shabihiana na Uqadiyyan.

Farrakhan kabla ya kujiunga na harakati za NOI, alikuwa ni mwanamuziki wa mtindi wa calypso Muimbaji na mpiga fidla (violin), na alitambulishwa NOI na rafiki yake na mwanamuziki mwenzake Rodney Smith, kwenye mkutano mkubwa wa mwaka uliojulikana kama Siku ya Waokozi (Saviours' Day).

Mkutano ambao ulikuwa unahutubiwa na Elijah Muhammad, alierithi uongozi kutoka kwa Wallace Fard Muhammad ambae ndio mwanzilishi wa NOI.


Na mwaka 1955, alikubaliwa kujiunga na NOI baada ya maombi yake kukubaliwa rasmi na Elijah Muhammad, na kupokea jina la X uku akisubiria jina jina, kutoka kwa kiongozi wa NOI (Wote wanaojiunga na NOI, upewa ubini wa X wakati wakisubiria majina mapya),  kwa hiyo akawa anaitwa Louis X, kabla ya kupewa jina Farrakhan, na baada ya hapo akatambuliwa rasmi kwa jina la Louis Farrakhan akiwa chini ya mafunzo kutoka kwa Malcolm X.

ELIJAH MUHAMMAD

Elijah Muhammad (Elijah Robert Poole) alizaliwa October 7, 1897 na kufariki tarehe 25 February, 1975.

Kulingana na maelezo yake mwenyewe, Elijah Muhammad, alifundishwa na Fard (mwanzilishi wa NOI) na mafunzo yake yalikua kila siku kwa miezi tisa mfurulizo, kisha mara kwa mara kwa muda wa miaka miwili.

Mnamo Mei 1933, muda mfupi baada ya kuhitimu na kusilimu na kupewa jina la Elijah Muhammad, Wallace D. Fard alipotea bila kuwajulisha wafuasi wake au kumtaja mrithi wake na hajaonekana mpaka leo.

Ndipo hapo Elijah, alipokamata uongozi, baada ya kuwashinda wapinzani wake kadhaa, Elijah Muhammad alisema kuwa Fard amemchagua kuwa mrithi wake na kumfundisha "mchana na usiku" kwa miaka mitatu. Alisema kuwa Fard alikuwa Mungu katika mwili (God incarnate), na kwamba Fard amemfunulia yeye peke yake na ndio Mtume wake.

Elijah Muhammad alianzisha gazeti, (The Final Call to Islam) Mwito wa Mwisho wa Uislamu, awali aklifundisha kuwa Fard ni nabii na baadaye akafundisha kuwa Fard ni Mwenyezi Mungu katika umbo la kibinadamu. (https://www.noi.org/noi-history/)


Elijah aliweza kupata wafuasi wengi kutokana na wengi wao walikuwa ni hoe hae kiuchumi, na NOI iliweza kuwasaidia kuwapatia kazi, kuwasomesha na kuwapa nyumba za kuishi.

Katika miaka ya 1970, NOI lilikuwa inamiliki Bekari za mikate, saluni za kunyolea, Migahawa, maduka ya vyakula, Maeneo ya kufulia nguo, Madanguro na klabu za usiku (night-clubs), mitambo ya uchapishaji, maduka ya rejareja, majengo mengi na mali zisizo hamishika, Mashamba Kadhaa makubwa, uko Michigan, Alabama, na Georgia.

Mpaka kufikia Mwaka wa 1972 NOI walikuwa na hisa kubwa kwenye mabenki ya Guaranty na Trust Co. NOI walikuwa wakimiliki shule kadhaa katika miji 47 nchini Marekani. Mwaka wa 1972, Muhammad aliwaambia wafuasi kwamba NOI lilikuwa na pesa zipatazo dola milioni 75.

UONGOZI MPYA

Alipofariki Elijah Muhammad mtoto wa Elijah Muhammad, Warith Deen Mohammed akachaguliwa kuwa kiongozi wa NOI. Na baade kubadilisha jina la harakati zao na kuita Jumuiya ya Kiislamu ya Ulimwengu wa Magharibi (World Community of Islam in the West). na baadae ikaitwa kwa jina la Jumuiya ya Waislamu wa Marekani (American Society of Muslims).


Warith Deen Mohammed alikuwa hakubaliani na mafundisho ya mwanzilishi wa NOI yaliokuwa yakifundisha kuwa Wallace D. Fard ni Mwenyezi Mungu katika Umbo la Kibinadamu na ndio Mahd na Masihi alie ahidiwa.

Na akaruhusu hata Wamarekani wenye asili ya Kizungu, kujiunga na harakati zao (Kabla ya hapo walikuwa hawaruhusiwi wazungu kujiunga nao, walikuwa wakiamini kuwa Wazungu wote ni Mashetani). Na alifanikiwa kuwavutia wanachama wasiopungua 2,000,000 (Milioni mbili wa NOI) kujiunga nae.

Farrakhan nae hakubaki nyuma, alijiunga na kumfuata kiongozi na Imam wao Warith Al-Deen Mohammed, wakifuata madhdhebu ya Sunni akiwa chini yake kwa miaka 3 1/2 kutoka mwaka 1975-1978. Imamu Muhammad akampa jina jipya la Abdul-Haleem.

KUASI KWA LOUS FARRAKHAN 

Lakini Mwaka wa 1978, Imam Farrakhan alijiondoa kutoka kwenye harakati za Warith Al-Deen Mohammed. Katika mahojiano ya mwaka 1990 na gazeti la Emerge, Farrakhan alisema kuwa alikuwa amekata tamaa na kuvunjika moyo baada ya kutambua kwamba imani iliyokuwa inafundishwa na Warith Al-Deen ilikuwa ya uwongo. Na akahamua kujiondoa kwenye harakati hizo na kuhuisha harakati zile zile zilizo hasisiwa na mwanzilishi wao Wallace Fard Muhammad.

Na Mwaka wa 1978, Farrakhan na akiambatana na idadi ndogo ya wafuasi waliamua kujenga upya Nation of Islam (NOI) kama lilivyokuwa awali na kuhuwisha ile misingi iliyoanzishwa na Wallace Fard Muhammad, na Eliya Muhammad. Hii ilifanyika bila ya kusemwa waziwazi.

Na baadhi ya itikadi yao ndio ile ya kuhitakidi kwamba Wallace Fard Muhammad ni Mungu katika Mwili na Elijah Muhammad ni Mtume wake.

Kama nilivyoeleza hapo juu kuwa wao wanahitakidi kuwa Elijah Muhammad kuwa ni Mjumbe (Messenger) wa MwenyeziMungu, na uhitumia Ayah hii kutoka kwenye Qur'an:

Na kila umma una Mtume. Alipo wajia Mtume wao walihukumiwa baina yao kwa uadilifu, wala hawakudhulumiwa.
Quran 10:47

Vilevile wanahitakidi kuwa mwanzilishi wa kundi lao Master W. Fard Muhammad, ndio huyo Masihi aliyehaidiwa wa Wayahudi na ndio huyo huyo Mahdi wa Waislamu na Ndio Mungu mwenyewe katika mwili.

Kubwa lingine kwenye vitabu vyao wanasema kuwa MwenyeziMungu alikuja duniani kwa umbo la kibinadamu na kwa jina la Fard Muhammad na kumchagua Elijah Muhammad  kuwa ni mtume au mjumbe wa MwenyeziMungu.

Ndio ukaona wakina Muhammad Ali na hata Malcolm X (Al-Hajj Malik Al-Shabazz) na wengine wakajitambua na kutambua kuwa hili ni kundi potovu wakajitoa.

Kwenye baadhi ya mafunzo yao wanasema kuwa:
- Watu weusi ndio hasa watu Halisi na wa Asili.
- Watu weupe (white people) ni Mashetani (devil).
- Watu weusi ni bora zaidi (superior) ya weupe.

Mtu mweusi nchini Amerika ya Kaskazini (USA) sio Negro, bali wao wanatoka kabila la Shabazz kabila lilipotea zamani, na waliibwa na wafanyabiashara kutoka Mji wao Mtakatifu wa Makka miaka 379 iliyopita.

Mtume (Fard) alikuja Marekani ili kuwaokoa ndugu zake waliopotea kwa muda mrefu, ambao Wazungu wamewapotozea lugha yao ya Kiarabu, utaifa wao na dini yao.
...Wanapaswa kujifunza kwamba wao ni watu wa asili, wa kwanza kabisa wa mataifa ya dunia. Wazungu yaani watu weupe wamepoteza rangi yao ya asili. Kwa hali hiyo basi Watu wa asili wanapaswa kurejesha dini yao, ambayo ni Uislamu, lugha yao, ambayo ni Kiarabu, na utamaduni wao, ambao ni elimu ya Anga (Elimu ya Faraki – astronomy) elimu ya juu ya hisabati, hasa mahesabu. Wanapaswa kuishi kulingana na sharia ya Mwenyezi Mungu, wakiepuka nyama zote zenye sumu kama vile, nyama ya Nguruwe, Bata, Bata bukini, jamii ya ndezi na samaki aina ya Kambare. Wanapaswa kuacha kabisa matumizi ya stimulants (Vihamshi), hasa pombe. Wanapaswa kujitakasa wenyewe - miili yao na nyumba zao. Na kwa njia hii watakua wakimtii Mwenyezi Mungu, nae atawarejesha tena kwenye Paradiso ambayo waliibwa uko kwenye mji wao wa asili- Mji Mtakatifu wa Makka.

Je Mafundisho ya huyu mtu yanafaa kusambazwa, maana itikadi yake haina tofauti na Maqadiyyan, hata huyu ana amini kuwa kuna mitume zaidi ya Mtume Muhammad (saw), je yafaa kujifunza kutoka kwao?

Wednesday, 20 March 2019

Ule Uhasama Kati ya CCM na CUF, Usije Ukawa wa Vyama Vitatu, CCM, ACT na CUF

Kabla ya Mapinduzi ya Zanzibar, historia inaonyesha kwamba, uko Zanzibar kulikuwa na mizozano mikubwa ya kisiasa baina ya vyama vikubwa vya kisiasa, yaani ASP na ZNP (Hizbu).  Mizozano hii ilijiri kati ya miaka 1955 mpaka1964, ilipoamuliwa kuwa na chama kimoja tu cha siasa uwamuzi ambao ulizima migawanyiko ya kisiasa ndani ya visiwa vya Zanzibar baada ya mapinduzi.

Makovu yale yaliotokana na chuki kati ya Wazanzibar wenyewe si kwamba yalikuwa yamepona kabisa, lahasha, ndani ya makovu yale kulikuwa na vidonda vibichi, vilivyokuwa vikifukuta kama shaba iliyoyayushwa.

Mfumo wa vyama vingi uliporuhusiwa tena na 1995 uchaguzi ulipo fanyika na CCM kuchukua ushindi, makovu yale ambayo yalizaniwa kuwa yamepona kabisa, yalitumbuka upya na kuwa vidonda vipya, uhasama mkubwa ukarejea upya kiasi cha kusababisha chuki kubwa baina ya ndugu wa familia moja kutoshirikiana katika shughuli za kijamii, kama harusi na misiba na mambo mengine kadhaa.

Hali ilikuwa mbaya zaidi kisiwani Pemba, maana walibaguana katika misiba, sherehe, vyombo vya usafiri na biashara, jambo ambalo lilidhorotesha maendeleo visiwani humo.

Matukio ya watu kuvamiwa na kupigwa, wananchi kususa kununua bidhaa za wafuasi wa chama kimoja, mabasi kukosa abiria au abiria kushushwa kwa sababu ya tofauti za kiitikadi, kususia kushiriki katika maziko na harusi yalitawala kwenye kisiwa hicho ambacho ni moja ya visiwa vikubwa viwili vinavyounda Zanzibar.

Mpaka kufikia mwezi Julai 31 ya mwaka 2010, baada ya kura ya maoni ya kuunda Serikali ya umoja wa kitaifa, uhasama na chuki baina ya wapenzi wa CUF na CCM, ukawekwa kando.

Hizi zilikuwa ni juhudi za viongozi wawili, aliekuwa rais wa Zanzibar Amani Karume na katibu mkuu wa CUF, Seif Sharif Hamadi walipohamua kuwa sasa inatosha na kwa kupitia vyama vyao (CCM na CUF) waamua kuwe na Maridhiano na Serikali ya umoja wa kitaifa ikaundwa.

Tukashuhudia utulivu, amani na upendo vikirejea tena miongoni mwa Wazanzibar wenyewe na maisha yakawa yenye utulivu, japokuwa si wote walilifurahia hili, maana kulikuwa na matukio ya hapa na pale kuonyesha kuwa si shwari kama inavyo onekana.

Nakumbuka vurugu kubwa zilizotokea mwezi May mwaka 2012, pale Jumuiya ya Uamsho ilipohusika na kuwachochea vijana kukusanyika na kufanya uharibifu ikiwemo kuchoma moto gari, kupanga mawe barabarani na kufanya hujuma mbali mbali kinyume cha sheria.

Chanzo cha vurugu zile zilitokana na wanaharakati hao kufanya maandamano makubwa ya kushtukiza ambayo yalizistua mamlaka za usalama visiwani humo, lakini baada ya kutawanyika jioni yake baadhi ya viongozi wa maandamano hayo walitiwa mbaroni.

Hayo twaweza sema yalishapita, maana kuna msemo mmoja wa Kiswahili unasema hivi; "Yaliopita si ndwele, tugange yajayo".

Wasiwasi wangu ni huu mgawanyiko uliotokea hivi karibumi, kwa baadhi ya viongozi na wanachama wa CUF, walipoamua kujiunga kwenye chama cha ACT, baada ya upande unao ongozwa na Pro. Lipumba kushinda kesi iliyokuwa inawakabila baina ya wanao unga mkono upande wa Seif Sharifu na upande wa Pro. Lipumba.

Nachelea ule uadui uliokuwa baina ya CUF na CCM, ukawa baina ya ACT, CUF na CCM kwa mbali, binafsi naamini kwa dhati kabisa kuwa lolote litakaloamuliwa na viongozi hawa wa CUF na ACT wanachama watalifuata.

Tunarajia, ule uhasama uliokuwepo baina ya wanachama wa CUF na CCM kiasi cha kutoshirikiana katika shughuli za kijamii, usihamie kwa wanachama wa CUF na ACT na wala usibakie CCM, vyama vya kisiasa hisiwe sababu ya kuharibu udugu, urafiki na ujamaa baina ya wanachama wa pande zote.

Tusisikie tena wanachama wa chama kimoja aidha ACT, CUF au CCM, wanashushwa kwenye daladala au kutouziwa bidhaa ya aina yoyote wanapokwenda markiti au dukani.

Tusisikie tena mashamba kuvamiwa na mazao kuharibiwa kwa sababu za itikadi za kisisas au kufukuzwa kwenye nyumba au kuchomeana nyumba kwa kuwa tu, fulani ni CCM/CUF/ACT.

Tusisikie tena, habari za kupopolewa kwa mawe kwa viongozi wa kisiasa kama ilivyowahi kutokea walipo popolewa mawe Maalim Seif Hamad na Dk  Mohamed Shein. Nakumbuka misafara yote miwili ilishambuliwa jioni ambapo baadhi ya wafuasi wa vyama hivyo walijeruhiwa na kukimbizwa hospitalini kwa matibabu.

Naandika haya kwa sababu, kugawanyika kwao kisiasa kunawafanya Wazanzibari wasiweze kukubaliana kuhusu masuala nyeti yanayohusu mustakbali wao na wa vizazi vyao vijavyo...

Thursday, 14 March 2019


Uchunguzi wa BBC Umebaini Matumizi ya Ugoro Ukeni

Baadhi ya wanawake kutoka mkoa wa Tabora nchini Tanzania wamekiri kuweka tumbaku katika sehemu zao za siri ili kupunguza hamu ya kufanya mapenzi (Jimai), huo ni uchunguzi uliofanywa na shirika la utangazaji la BBC.

Tabia hii ya wanawake kuweka Ugoro kwenye sehemu zao za siri umekuwa ni maarufu sana haswa kwa wanawake ambao hawaja olewa, wajane na wale walio olewa ila wanaishi mbali na waume zao.

Madaktari wameonya kwamba tabia hii ya wanawake kuweka ugoro sehemu za siri si salama kiafya na kuna uwezekano mkubwa wa kupata saratani ya kizazi na matatizo mengine ya kiafya (Hakuna utafiti rasmi kuthibitisha).

Wanawake wengi huko Tabora, ambao ni wajane, na wale ambao hawapo kwenye mahusiano au waume zao wapo mbali nao, wanatumia njia hii ili kupunguza hamu ya kufanya mapenzi.

Zaituni Shaban (mjane), anasema tangia mumewe kufariki, hajawahi kujisikia haja ya kupata mume mwingine.
"Naweka tu ugoro kwenye sehemu zangu za siri mara mbili kwa wiki. Hivi sasa, sina mpenzi wa kijinsia, na sijawahi kujisikia haja ya kuwa na mume, tangia kifo cha mume wangu miaka michache iliyopita," anasema Bi Shaban.
Mwanamke mwingine, Asha (sio jina lake halisi), anasema ameigeukia tumbaku "...na imeua kabisa hamu yangu ya jimai kwa sababu tangu nilipotelekezwa nikiwa mjamzito, sitaki kusikia chochote kutoka kwa wanaume na haswa swala la ngono".

"Ugoro unanitoshereza kabisa. Ninapotumia hamu yangu yote ya ngono hufa" alisema Asha.

Wanawake wengi wanasema mara nyingi wanachukua majani ya tumbaku ghafi, uyasaga na kuchanganya na mafuta ya Vaseline au Petroleum jelly na Magadi soda (au Majivu) ili kufanya mchanganyiko ywenye ufanisi.

Wanawake wengi walizungumza na BBC, walisema kwamba sehemu zao za siri uwasha kwa muda baada ya kutumia mchanganyiko huo.
"Mara nyingi mimi huweka tumbaku katika sehemu zangu za siri mara mbili kwa wiki. Inakaa huko kwa dakika chache kabla ya kuiondoa kwa kuosha. Baada ya hapo, huwa nasikia muwasho kwa muda na baada ya hapo hisia za kufanya mapenzi uniondoka. Hakuna madhara yoyote yatokanayo na mchanganyiko huu ninaoujua mimi..."anasema Zaituni Shaban.
Wanawake hao kwa ujumla wanasema kwamba tumbaku uwarizisha kwenye hisia za kufanya mapenzi.

Wanaume katika Kijiji cha Ugala huko Tabora walipo hojiwa walisema hawajui kwamba wanawake katika mkoa huo wanatumia tumbaku katika sehemu zao za siri.

"Nimesikia sana huu uvumi kuhusu hii tabia ya wanawake kutumia tumbaku, lakini nilipowauliza, mara nyingi wananiambia: Hiyo ni siri yetu," alisema Mzee Usantu, mwenyeji wa Kijiji cha Ugala.

Madaktari wanawaonya wanawake dhidi ya kutumia tumbaku katika sehemu zao za siri kwa sababu inaweza kusababisha kansa ya mlango wa uzazi.
"Hakuna utafiti thabiti uliofanywa ili kujua haswa madhara ya tumbaku katika sehemu za siri za mwanamke. Hata hivyo, wengi wa wagonjwa wetu wa saratani ya kizazi wanatoka mkoani Tabora, na tukiwauliza wengi wao wanakubali kuwa wamekua wakitumia tumbaku kuweka sehemu zao siri, japo mara moja katika maisha yao," anasema daktari mmoja ambaye alizungumza na BBC.
Source:
Pulselive

Friday, 1 March 2019

Relationship Sexuality Education; RSE

 • Tunapaswa Kuruhusu Watoto katika Matamasha ya (Ngono) Wakaa Uchi?
 • Je Elimu ya Ngono Kufundishwa Mashuleni kuanzia Shule za Msingi darasa la Pili.

Nilikuwa nimekaa naangalia vipindi kwenye Luninga, taarifa za habari na mambo kadhaa yanayojiri ulimwenguni. Moja ya kipindi kilichovuta usikivu wangu, kilikuwa kinahusu mjadala wa wapendao kukaa uchi, wanao jihita Naturist, yaani wanaoitakidi kuwa binadamu asili yake ni kukaa uchi ni hiwe haki ya kila mtu, wakiwemo wanafamilia pamoja na watoto wanaopendelea kwenda uchi na hiwe haki kisheria kuwashirikisha watoto...

Mjadala huu, umenikumbusha ule mjadala wa mashoga, na kampeni zao za kutaka kila mtu aunge mkono harakati za kishoga za liwati na usagaji na hata ndoa za jinsia moja.

Kiasi sasa ndoa za jinsia moja zimehalalishwa kwenye baaadhi ya nchi za Ulaya, ikiwemo nchi za Ubelgiji (Belgium), Denmark, Ufini (Finland), Ufaransa (France), Uingereza, Ireland na nchi zingine za Amerika na Kiafrika pia ikiongozwa na nchi ya Afrika Kusini.

Awa awa karne chache tu nyuma, babu zao (Walami) walitawanyika duniani na haswa nchi za Kiafrika na kukuta baadhi ya watu (si wote) wakitembea uku wamevaa upatu tu, kusitiri viungo binafsi, wakawaona kuwa si wastaarabu na washezi. Wakawapa nguo na kuwashinikizia kuamini imani mpya.

Waafrika kama ilivyo asili yetu ni uungwana na kuwapenda wageni wakakubali baadhi ya ustaarabu wa hao Walami, baadhi wakaamini...

Leo hii, ustaarabu ule, umebakia kwa Waafrika na Ushenzi ule ule wa mababu wa Kilami, umekuja na umerejea kwa kasi sana kwenye hizi nchi za Kilami, kiasi ya kwamba, mwanamke akijistiri anaonekana yupo kinyume na ustaarabu wa dunia na ukiwa uungi mkono harakati za mashoga na wasagaji, basi waonekana wewe si mstaarabu tena mbaguzi, na unaweza hata kupata misukosuko na hata kutengwa na taasisi za Kiserikali na hata binafsi.

Kama haitoshi, hivi sasa kwenye hizi nchi zikiongozwa na Uingereza na Marekani, wamekuja na mtaala mpya wa Kielimu, kwamba watoto kuanzia shule za Msingi na sekondari ni lazima wafundishwe elimu ya Mahusiano na Elimu ya Jinsia - Ngono (Relationships and Sexuality Education ). Na ni somo la lazima, si hiyari.

Watoto watafundishwa mengi, yakiwemo kukubali uwepo wa familia tofauti tofauti kwa maana ya familia iliyo ya jinsia mbili (Mke na Mume) na ile inayojengwa na jinsia moja aidha mume/mume au mke/mke na mengine mengi kuhusiana na mahusiano ya Kingono.

Wengi wanaweza kusema, hayo ni ya uko Ughaibuni, lakini wasisahau kwamba, dunia hii ndogo, michanganyiko ya mila na tamaduni mbalimbali ndizo zinazojenga jamii na ni moja kati ya Utandawazi (globalization).

Haya yanayofanyika sasa kwenye hizi nchi za Kimagharibi, hayaishii kwenye hizo nchi tu, tumeshuhudia matishio kadhaa ya kiuchumi kwa nchi ambazo hazitoi haki za usawa kwa mashoga na wasagaji.

Kama nchi hairuhusu Ushoga basi ina hatari ya kuwekewa vikwanzo na nchi zinazo endeshwa na mashoga na kwa wale wazamiji wanataka kuishi hizi nchi, kiasi wamepata kisingizio, wanachofanya ni kusema tu kuwa wao ni mashoga na wamekimbia manyanyaso kwenye nchi zao, basi haraka sana wanakumbatiwa na kukubaliwa kupewa hifadhi.

Na sasa hivi kwenye hizi nchi zetu zinazoitwa dunia ya tatu, kampeni ndogo ndogo za chini chini zimeanza kuchipua, lengo ni kutaka kuionyesha jamii kuwa elimu ya ngono inapaswa kufundishwa kuanzia madarasa ya chini kabisa ya shule za msingi aidha kuanzia darasa la pili au la tatu kama si chekechekea.

Tutasikia visa vingi kutoka kwa mawakala wa ngono na mashoga, tutasimuliwa simulizi za kutunga na hata zile zenye ukweli nusu ili kuhalalisha elimu ya ngono ianze kufundishwa kuanzia aidha chekechea au shule za msingi kuanzia darasa la kwanza au la pili.

Tusipo kuwa makini, basi tutaingizwa kwenye ulimwengu wa manyani wa kutembelea utupu, tukibaki kuchekena kicheko cha (Ashamkumu si Matusi) "Nyani haoni Kundule.

Je tutawalinda vipi Watoto zetu, maana sasa ni Hamkani si Shwari tena

Sema: Mola Mlezi wangu ameharimisha mambo machafu ya dhaahiri na ya siri, na dhambi, na uasi bila ya haki...
Q 7:33

Sunday, 16 December 2018

KATIKA HILI NAMUUNGA MKONO RAIS MAGUFULI

Wengi wetu/baadhi yetu tutakuwa aidha tumesoma au kusikia tu kuwa Bunge la Umoja wa Ulaya (European Union) limepitisha maazimio kadhaa dhidi ya serikali ya Tanzania.

Maazimio hayo yana masharti mengi magumu, yakiwemo haki za ushoga (Hapa wengi wanashindwa kuelewa, unaposikia haki za mashoga hapo wana manisha si kutambuliwa uwepo wao tu, lah hasha bali kuwapatia uhuru wa kujitangaza, kuhamasisha wengine kujitokeza adharani na kujianika wazi na hata haki za kindoa za kuoana (Gay pride). 

Maazimio mengine ni kutetereka kwa haki za binadamu na kuminywa kwa demokrasia...

Binafsi namuunga mkono rais wa Jamuhuri ya Muungano ya Tanzania, Dk. John Pombe Magufuli na kuyapinga maazimio hayo ambayo kwa uwazi kabisa yameletwa kutokana na misimamo ya Rais ya kulinda rasilimali za Tanzania.

Kizaa zaa cha chuki na nia ya kulipiziwa kisasi kilianzia pale alipotoa amri ya kuzuiya mchanga wa dhahabu (makinikia) na kudhibiti Tanzanite. Vibaraka wachache walijitokeza na kuwaunga mkono wakoloni mambo leo, lakini kwa msimamo thabiti wa Rais wa nchi akisaidia na baraza lake la Mawaziri, walisimama kidete na kukataa waziwazi kuburuzwa na kuuza utu wetu kwa mabepari ambao kila kukicha wanatafuta mbinu mpya za kutubana ili wajichotee maliasili za Tanzania kwa ulahisi, uku wakitutaka kwa nguvu kuachana na mila na desturi zetu.

Tanzania ni nchi huru, yenye mamlaka kamili ya kujiamulia mambo yake yenyewe kama zilivyo huru nchi za ulaya na kujiamulia mambo yao wenyewe. Ustarabu wa ulaya si lazima uwe wa Afrika hususani Tanzania...

Mtuache tupumue

#RaisWanguNchiYangu
#NamuungaMkonoMagufuli
#RaisWanguMagufuli

Saturday, 15 December 2018

KISWAHILI NA KIINGEREZA NI
LUGHA ZA TAIFA LA TANZANIA
Waweza Ona kuwa ni Ajabu Lakini Ndio Ukweli Wenyewe.

Unaweza kushangaa na kicha cha habari hapo juu, lakini huo ndio ukweli ambao wengi wetu hatu hujuwi.

Lugha ya Kiswahili ni lugha kongwe, ni lugha ambayo ikizungumzwa na wakaazi wa Afrika Mashariki na ya kati kabla ya kuja kwa Wakoloni wa KIjerumani na Waingereza.

Lugha ya Kiswahili ilitumika na wafanyabiashara wa pwani ya Afrika Mashariki, ikaendelea kutumika kipindi cha mkoloni (Mjerumani), wakoloni wa Kijerumani waliendelea kuwaachia Watz waongee lugha yao ya Kiswahili.

Alipokuja Waingereza hapo ndipo Kiingereza kikawekwa kwenye mitaala ya kufundishia, na ndio utaona wazee wengi waliosoma enzi ya Muingereza na hata Mjerumani, wanaongea na kuandika Kiingereza kizuri sana, tena kile fasaha  kile cha Oxford.

Tulipopata Uhuru na kujitawala rasmi, lugha ya Kiswahili ndio ikawa lugha rasmi ya kufundishia, kiingereza kikabakia kuwa lugha ya Kiutawala (Kiserikali) kwenye mambo ya sheria na biashara za Mabenki n.k.

Ilikuwa mtu akisikika anaongea Kiswahili aidha watamuona kuwa anajikwenza na kujiona Msomi au anajitia kimbelembele kwa kuzungumza lugha ya mkoloni, kiasi watamuona kuwa ni mtu mwenye majivuno.

Vijana wengi waliosoma baada ya uhuru ni aghalabu sana kuwasikia wakiongea Kiingereza vizuri, kwa sababu hakuna shuruti au ulazimisho wa wao kuona kuwa wanapaswa kuzungumza Kiingereza. Matokeo yake Majumbani, Maofisini na hata Seikalini asilimia 99.99 ni Kiswahili, ila kwenye yale mambo ambayo yanahitaji sheria kwenye makaratasi ndio uwa kwa Kiingereza.

Idadi ya watoto walipaswa kuanza shule ya msingi, haikuwa ya kuridhisha sana, kiasi kukapitishwa Azimio ndani ya Azimio la Arusha kuwa kuwepo na dhamira ya wazi ya kuwapatia watoto na kila ambae hakusoma elimu ya msingi ambayo kijana anapomaliza aweze kujitegemea.

Ndipo mwaka 1974 kukapitishwa Azimio la Musoma, 1974 "Elimu kwa wote" Universal Primary Education (UPE). Kwa kifupi ikaitwa elimu ya UPE na harakati zake zilikuwa kubwa kuanzia mwaka 1977.

Mikakati haswa ilikuwa kwa wananchi waishio vijijini ambao wengi wao walikuwa hawana mwamko wa kutaka kusoma, ndipo mipango ikafanywa ili kila mtu angalau ajue tu kusoma na kuandika. Kulikuwa pia na wazee ni wengi wasiojua kusoma na kuandika; kukaanzishwa "Elimu kwa watu wazima".

Vijana wengi waliingizwa shule za msingi, na haikuwa ajabu kwa wale walokuwa wamesoma miaka ya 70 mpaka 80, kusoma na vijana waliokwisha pea kiumri wa kuanza shule. Tulifikishwa mahali pazuri kitakwimu duniani kuhusu wasojua kusoma na kuandika.

Wakati huo huo, kulikuwa na matatizo ya kukosekana kwa walimu wa kutosha, ndipo hapo sasa, serikali kupitia wizara yake ya Elimu, ikaweka mikakati ya kuwapeleka kusomea ualimu vijana wengi waliomaliza darasa la saba waliopata maksi za wastani, wakaitwa walimu wa UPE.

Walimu awa walikuwa kama vile wasaidizi wa walimu, kwa sababu elimu yao hakuwa kubwa kiasi cha kupewa wanafunzi kusomesha, kwa sababu wao wenyewe waliishia shule za msingi (darasa la saba) na kisha kupelekwa kusomea ualimu na kurejeshwa kufundisha shule za msingi.

Kidogo kidogo, kutokana na upeo wao kuwa si mkubwa, pamoja na kudharauliwa, elimu ya msingi ikaanza kushuka, na angamizo ubwa lilikuja pale dunia ilipokuwa kwenye mgogoro wa kiuchumi, hali ambayo iliyakumba mashirika ya fedha ya duniani kama vile IMF, Benki ya Dunia (WB) n.k.

Kwa ufupi naweza kusema kuwa mambo yote hayo yamesababisha sekta ya elimu kuwa na upungufu mkubwa wa rasilimali zinazosababisha mabadiliko ya maendeleo kwenye elimu ya UPE, hali ile ikasababisha kushuka kwa kwa wingi ubora katika ngazi zote za elimu nchini Tanzania.

Walimu wasio na upeo na juzi wa kutosha, mishahara duni, mazingira magumu ya kazi pamoja na miundo mbinu afifu imepelekea walimu walio na upeo na ujuzi mzuri kukosa hali na hamasa ya kufundisha vizuri, wengi wao wakajikuta wakijishughulisha zaidi na biashara ndogo ndogo ili waweze kujikimu kimaisha.

Msumali wa mwisho wa kwenye jeneza la elimu, lilipigiliwa kati ya mwaka 1978–1979, pale tulipoingia kwenye vita na Uganda, mika miwili ile ilipelekea nchi kutumia mabilioni ya pesa kwenye vita na kusababisha wizara zingine kama wizara ya Elimu, kupunguziwa bajeti yake ya fedha. Na mzimu wa ufukara ukaendelea kutuandama mpaka leo, hatujaweza kunyanyuka tena, japokuwa tuliambiwa tufunge mikanda kwa miezi kumi na nane, lakini mpaka hivi sasa zaidi ya miaka 38 haijafunguliwa.

Mambo ni mengi sana kwa kweli, na hata sasa bado lile jinamizi la ukosefu wa elimu nzuri linatuandama, kwa sababu kizazi kile kilichopitia elimu ya mkoloni, wengi wao kama hawapo serialini basi washajipumzikia majumbani mwao na hawajishughulishi tena na harakati zozote za kuinua elimu au walisha tangulia mbele ya haki...

Kizazi kilichobakia ndio kile ambacho kilipitia kwenye elimu ya UPE na waliobakia ndio awa wa kizazi cha doti komu, sasa hivi mtoto anajifunza Kiingereza shule, akirudi nyumbani asilimia 100 Kiswahili, mtaani ndio kabisa, ni Kiswahili kilicochanganyika na lugha za misimu. 

Kizazi cha doti komu ndio vijana watumiaji wengi wa mitandao ya kijamii ni vijana wasio penda kujifunza wala kukubali kuelekezwa. Hawapendi kusoma, bandiko lenye kurasa mbili kwao ni kubwa mno. Ndio hao wenye kuchanganya Kiswahili na Kiingereza na ilihali lugha zote hawazijui.

Uandishi wao umeathriwa na utumaji wa meseji kabla ya kuja kwa mitandao ya kijamii. Ilipoanza kuja kwa mitandao ya kijamii na tovuti balaza (Forums) ndio utaona wakiandika bila kuweka irabu, au kukatisha maneno, sababu ya yale mazoea ya kukata maneno.

Kuna haja ya makusudi kabisa, ya serikali na taasisi binafsi kuliangalia swala hili, kwa sababu tunapo elekea siko, maana si ajabu leo hii ukaona wahitimu wa vyuo vikuu wawe wanasheria au waandishi wa habari au wachumi, wengi wao awajui kuandika Lugha zote hizi aidha ya Kiswahili au ya Kiingereza, na kama ikitokea kwa bahati mbaya mtandao wa google kuzimwa, basi na wao watakuwa wamezimika kabisa kabisa.

Mapambano ya Makubwa ya Kielimu Yanahitajika Nchini Tanzania...

Wednesday, 31 October 2018

CHIMBUKO LA SHEREHE ZA HALLOWEEN
Je Wangapi Wanasheherekea Siku Hii?
Miaka hii ya karibuni kumekuwa na ongezeko kubwa la watu kusheherekea siku hii ya Halloween (Watakatifu, Mizimu au wafu), wengi wanao sheherekea halloween hawajui kuwa hii ni moja ya sherehe za Kipagani. kwa ufupi ni kwamba watu wengi husherehekea sikukuu ya Halloween bila kujua chanzo chake.

ASILI YA HALLOWEEN
Asili ya sherehe zenyewe haswa ni tamasha la dini ya kiuchawi inayoitwa Wiccan, ambao hufuata desturi za Waseltiki wa kale (Celtic uko Ireland) na wao bado huita Halloween kwa jina lake la kale, yaani, Samhain (tamka Sawin), nao husema kwamba huo ndio usiku mtakatifu zaidi katika mwaka.

Sherehe hii ni hitimisho la kipindi cha mavuno na kuanza kwa majira ya baridi na kuanza kwa mwaka mpya wa Kiseltiki. Kipindi hicho cha baridi kilikuwa kinaitwa kipindi cha mwaka kisicho na nuru (Darker Half of the year) kulingana na kalenda ya Waseltiki, kipindi ichi ndio mwanzo wa mwaka mpya wao.

Sherehe hizi kwa sasa ufanyika kuanzia tarehe 31 Oktoba hadi 1 Novemba ya kila mwaka.

Kipindi hiki cha mwisho wa mavuno, kiliaminika kwamba usiku huo kabla ya mwaka mpya mpaka au kizuhizi kinacho watenganisha walio hai na wafu huwa kinatoweka hivyo mizimu ya wafu huja duniani tena. Na wafu au Mizimu hiyo wanaweza kutembea katikati ya watu walio hai na kuwasababishia madhara na majanga mengi ikiwemo kuharibu mavuno yao.

Lakini pia waliamini kuwa mizimu hiyo au wafu hao wanapokuja duniani wanaweza huwasaidia watabiri kutabiri mambo yao katika mwaka huo wa baridi na giza.

Waliamini wanapofanya kafara (sherehe) na kuacha vyakula nje ya nyumba zao au kutoa vyakula na wanyama kwa ajili ya kafara. Mizimu yenye roho nzuri itawasaidia kukivuka kipindi cha badiri kwa salama.

Katika kuadhimisha hii siku, makuhani wao wakishirikiana na raia wengine, walitengeneza moto mkubwa (Bonfire). Moto ambao ulitumika kuchoma mazao ya nafaka na wanyama kama matambiko kwa mizimu (wafu) ya Waseltiki. Walipokuwa wakifanya hivi, walivaa mavazi rasmi ya kutambikia miuzimu yao.

Walivaa mavazi ya aina mbalimbali kama vile, Vinyago (Cenhadon) vichwa na ngozi za wanyama, wengine walivaa mavazi ya kutisha kwa lengo la kuwachanganya mizimu wadhani na wao ni mizimu wenzao hivyo wasiwadhuru kwa namna yoyote ile wanapokuwa nje usiku wa samhain. Wengine waliwapa hii vitu vitamu kama vile peremende ili kuituliza isiwadhuru.

MUUNGANIKO WA IMANI
Kwenye Karne ya 7 Papa Boniface wa Nne alianzisha sherehe ya kila mwaka ya Siku ya Watakatifu Wote ili kuwakumbuka wafia-imani. Lengo haswa la sherehe hii ilikuwa ni kuifunika sherehe hii ya halloween, na baadaye ikahusisha pia watakatifu pamoja na mashahidi wa imani na ikaondolewa toka May 13 na kuwa Nov 1.

Baadae ikaja kuwa sikukuu ya makanisa kadhaa duniani kama vile Kanisa Katoliki la Kirumi (RC ndio wahasisi), Ushirika wa Anglican, Kanisa la Methodist, Kanisa la Kilutheri, Kanisa la Mabadiriko (the reformed Church), na makanisa mengine ya Kiprotestanti. 

Vilevile Kanisa la Orthodox ya Mashariki na Makanisa ya Kikatoliki ya Mashariki na Makanisa ya Kilutheli ya Uturuki (Byzantian Lutheran), pia usherehekea siku ya Jumapili ya kwanza baada ya Pentekoste. Makanisa ya Orthodox ya Mashariki ya Wakaldayo na makanisa ya Katoliki ya Mashariki.

Kufikia karne ya 18, ukristo ulienea zaidi kwenye jamii ya Waseltiki na kufanya Waseltiki waunganishe baadhi ya mila zao na mila ngeni kwao za ukristo.

Kanisa lilikuwa linajaribu kuiua Samhain ya kipagani kwa kuwapatia shereehe au maadhimisho yenye mrengo wa kitakatifu zaidi. kwa mfano All Souls day, Siku za Roho Zote ni tamasha katika baadhi ya Makanisa ya Kikristo, ufanya sala kuwaombea roho za wafu, ambayo ufanyika mwezi Novemba kila mwaka.

Kwenye sherehe hii watu walivaa kama kuwaiga watakatifu wa Kikristo au mfano wa malaika wakawasha moto. Sikuhii ya watakatifu ilikuwa inaitwa Siku ya Watakatifu Wote (All hallows au All hallowsmas  ikiwa na maana All Saints).

Wafia utamaduni hawakutaka kuiwacha sherehe yao, japo walikuwa tayari wameshakuwa Wakristo wa Kikatoliki na Kiprostetanti. Baadae ule utamaduni wa usiku wa Samhain katika eneo la Waseltiki nao ukaanza kuitwa Usiku wa Watakatifu (All-hallow Evening au Eve) na hatimaye likaja neno Halloween.

Waseltiki walijitahidi kuukubali ukristo hapa na pale lakini walishindwa kuacha imani zao za kipagani na hivyo wakaamua kuzichanganya changanya na Ukristo kukidhi mahitaji yao. Na ndio Samhain yao ilivyogeuka kuwa Halloween. Hivyo wapagani walioletewa ukristo walilichukua neno All hallows lenye maana ya Watakatifu Wote neno ambalo lilitumika siku ya watakatifu ya wakatoliki, wakaliweka katika sikukuu yao ya kipagani na hatimaye wakapata jina lao la Halloween.

HALLOWEEN YAHAMIA NCHINI AMERIKA KARNE YA 19

Mwanzoni mwa karne ya 19 maelfu ya wahamihaji kutoka nchini mbalimbali walihamia nchini Marekani Wahamiaji hawa ambao wengi walitoka Ireland ambao walikuwa wanakimbia janga la ukame na njaa mwaka 1845 mpaka mwaka 1852, inasemekana njaa ile iliuwa watu zaidi ya milioni moja. Waairishi walipo hamia Marekani walikuja na desturi na mila zao za kusheherekea siku ya Halloween, na baada ya muda, desturi hizo zinachanganywa na zile za wahamiaji wengine kutoka Uingereza, Ujerumani, Afrika, na sehemu nyingine za ulimwengu.

Mpaka kufikia Karne ya 20 Halloween ikaja kuwa sikukuu maarufu kotekote nchini Marekani. Mpaka leo hii Wamarekani wanaadhimisha sherehe hii ya Halloween, na ni moja kat ya sikukuu kubwa kabisa.

Siku hii si kwamba ilianza kwa kishindo la hasha, ilipoingia Amerika, Halloween ilibadilika kidogo kidogo. Vionjo na manjonjo kadhaa viliongezewa, mfano ndugu na hata majirani walikutana na kusimuliana visa na ngano (hadithi za wafu) na simulizi za kutisha. 
Wengine wakiwafata watabiri kusikiliza maajaliwa yao, vilevile waliburudika kwa kuimba na kucheza. 

Waamerika nao wakaanza kuvaa mavazi ya Halloween wakipita nyumba hadi nyumba kuomba chakula na pesa kama sehemu ya kusherehekea Halloween. Kumbuka utaratibu huu ulitoka kwa waseltiki ambao walipita nyumba hadi nyumba wakiomba mazao na wanyama ili wakatoe kafara zao kipindi kile cha mwanzo.

Utaratibu huu ndio ukaja kuwa "Trick or treat" ya leo inayofanyika Halloween. Trick or treat ni kwamba watoto wanapita nyumba hadi nyumba wakikusanya peremende (pipi), biskuti wengine wanatoa pesa. Trick ni kitisho tu kuwa usipotoa watakufanyia mazingaombwe. Treat ndiyo hiyo unawapa ili wasikufanyie mazingaombwe.

MAPAMBO NA ZAWADI
PEREMENDE: Waselti wa kale walijaribu kuwatuliza roho waovu kwa kuwapa peremende. Baadaye, kanisa liliwatia watu moyo waende nyumba kwa nyumba Mkesha wa Siku ya Watakatifu Wote ili kuwaombea waliokufa na kupewa chakula kama malipo. 
Mwishowe hiyo ikaja kuwa desturi ya Halloween, watu walienda nyumba kwa nyumba wakiomba peremende na kuwatisha watu wasiowapa peremende.

MAVAZI: Waselti walivaa vinyago (Cenhadon) ili roho waovu wadhani kwamba wao ni roho na hivyo wasiwadhuru. Kanisa liliingiza desturi za kipagani katika sherehe za Siku ya Wafu na Siku ya Watakatifu Wote. Baadaye, waadhimishaji walienda nyumba kwa nyumba wakiwa wamevalia kama watakatifu, malaika, na mashetani.

MABOGA: Aina fulani ya boga linaloitwa tanipu lilichongwa na kutiwa mshumaa ili kufukuza roho waovu. Watu fulani walisema kwamba mshumaa huo uliwakilisha nafsi zilizokuwa zimezuiliwa toharani. Baadaye, watu walianza kutumia maboga ya kawaida.

SHEREHE ZA HALLOWEEN SIKU HIZI
Ingawa Halloween huonwa kuwa sikukuu tu ya kujifurahisha na haswa watoto, na kila mwaka idadi ya watu wanaoisherehekea katika nchi mbalimbali inazidi kuongezeka. Hata hivyo, watu wengi ambao wameanza kuisherehekea hivi karibuni hawajui kwamba ishara, mavazi na hata mapambo, na desturi za Halloween, ambazo nyingi zinahusianishwa na viumbe wa roho wenye nguvu zisizo za kawaida na uchawi, zilitoka kwa wapagani.

Nchi za Ulaya ya Kaskazini ikiwamo Uingereza walikuwa wakisheherekea siku hiyo ambapo wahamiaji kutoka Scotland na Ireland walioingia Marekani waliingia na utaratibu huo wa maisha.

Sherehe hii nchini Marekani ilianza kupata nguvu mwanzoni mwa karne ya18 mwanzoni wa mwaka 1900, ambako watu walikuwa wakipelekeana kadi za pongezi, karatasi zenye maua na urembo wa aina mbalimbali.

Hata hiyo mavazi ya kuvaa siku hiyo hususani majira ya jioni maarufu 'trick-or-treat' yalianza kuonekana miaka ya 1930 na mengine miaka 1950 Halloween ilianza kuingia hadi mashuleni.

Siku hii ya Halloween watoto mashuleni huruhusiwa kuvalishwa mavazi ya ajabu ajabu, wengine wakiigiza watu maarufu, wengine wakivaa kama wanyama na kadhalika, na ndio wakati huu trick or treat upamba moto.

Na kuanzia hapa sasa Halloween ikawa utamaduni mpya wa Wakazi wa Ireland (Waairishii) na Waamerika. Wamerikani ndio wanaongoza kwa kusherehekea Halloween, na ndio kipindi cha michezo ya Kuigiza na sinema za kutisha zikiambatana na maudhui ya mauwaji na kichawi.

Baadae mahitaji ya vitu kwa ajili ya siku hii yalizidi kuwa makubwa kadiri sherehe hizo zilivyokuwa zikipata uungwaji mkono na jamii mbalimbali.

Kwa sasa siku hii imeonekana kuwa ya kiuchumi (Kibiashara) zaidi kutokana na utengenezaji wa vitu mbalimbali muhimu kwa ajili ya siku hii. Halloween imekuwa biashara kubwa inayowaletea wafanyabiashara mabilioni ya pesa ulimwenguni pote.

RAMADHAN KARIM

Read

Subscribe to RSS Feed Follow me on Twitter!